Konpetentzietarako ekintzak
Konpetentzietan oinarritutako kudeaketa:
Konpetentzien Hiztegiaren bidez, talentu publikoaren eraldaketa lortu nahi da. Horrexegatik baliabide berritzaile horrek ziurtatutako du, enplegatu publikoa prest egotea egungo nahiz etorkizuneko erronkei aurre egiteko. Konpetentzien hiztegi hau talentuaren kudeaketa euskal administrazioan eraldatzeko tresna ezin hobea da. Gaur egungo erronkei ez ezik, aurrerantzean sortuko direnei ere aurre egiteko beharrezko gaitasunak identifikatu eta garatzen ditu.
Konpetentzien hiztegia: erakundeko barne-dokumentua da, konpetentziak estrategiaren arabera definituta aurkezten dituena.
Konpetentzia Generikoak:
Erakundeko denei aplikatzeko konpetentziak dira, bakoitzari bereak, bere neurrian. Edozein esparru profesionaletan ezinbesteko diren zeharkako abilidade, trebezia, jarrera eta ezagutza guztiak dira. Eskutik eskura doaz eta langileei malgu izan eta egoera eta maneiu desberdinetara egokitzen laguntzen diete”. Oinarrizko konpetentzietatik eratorritakoak dira konpetentzia generikoak, eta gure ustez erakundeko denek izan behar dituzte, lanpostu guztietan behar baitira, gradu desberdinetan bada ere. Horregatik, lanpostu-talde bakoitzaren konpetentzien profila osatu behar da.
Gaitasun generikoak oinarrizko konpetentzietatik datoz. Guk zortzi konpetentzia generiko hautatu ditugu:
• Plangintza eta antolamendua: Helburuak eta lehentasunak definitu eta ekintza-planak diseinatzea da, zereginak, prozesuak, proiektuak eta baliabideak antolatuz eta aurrekontuetara eta denbora epeetara egokituz. Horren barruan dator aztertzea zer-nola doazen aurrera bete-beharreko atazak, jarraipena egiteko mekanismoak erabiliz eta aurrerabidea egiaztatuz, eta beharrezko neurri zuzentzaileak aplikatzea.
• Sareko talde-lanean aritzea: Etengabe eta sistematikoki lankidetzan aritzea helburu komunak eta antolaketa-helburuak lortzeko, talde-lana eta sare-lana aplikatuz eta sustatuz. Ezagutzak, esperientziak eta ideia berriak partekatzea eta trukatzea da helburua, eta baliabideak eta informazioa ondo erabiltzea, elkarrekin lankidetzan. Horrek esan nahi du besteekiko uste ona izan behar dela, besteak ulertu, eta lan-giro ona sortu eta kaskartzen ez utzi.
• Gatazkak kudeatzea: Gaitasuna edukitzea jendartean gerta daitezkeen presio-, kontingentzia- eta gatazka-egoerak aurreikusteko, identifikatzeko eta administratzeko, eta, aldi berean, gai izatea erakundearen esparrura egokitutako irtenbide estrategiko egokiak proposatzeko, kontuan hartuz egokitzeko premia daukatela bai jendeak bai erakundeak.
• Emaitzetara bideratutako jarduna: Lan-unitateak eta erakundeak ezarri dituzten helburuak lortzeko ahalegin guztiak planifikatu eta bideratzeko gaitasuna edukitzea da; azkar eta arin jardutea, baita berehala ere, herritarren premiei erantzuteko eta erakundea hobetzeko; beharrezkoa bada, erabaki garrantzitsuak hartzeko beldurrik gabe. Konpromiso bikoitza hartzea da: batetik, egin beharreko atazarekin eta, bestetik, helburuak betetzearekin (ezarritako epe eta eratan betetzearekin, kalitate egokia emanez eta gastua zorrotz eta ardura handiz kontrolatuz). Lorpen adierazleak ezartzea eta kudeatzea eta etengabeko jarraipena egitea ezinbestekoa da. Eta gerta daitezkeen gorabeherei aurrea hartzea.
• Arazoak konpontzea: Arazoei zorrotz heltzea da, eta alderdi garrantzitsuenak eta kausak identifikatzea, konponbide onena hautatzeko, finkatutako epeetan eta egoeraren arabera: alegia, inplementatzeko zein aukera dauden, zenbat baliabide dauden eskura, eta zer ondorio eta arrisku erator daitezkeen.
• Erabakiak hartzea: Aldaera edo aukera desberdinak aztertzeko gaitasuna izatea da, inguruabarrak eta eskura dauden baliabideak kontuan hartuta, baita horiek negozioan izango duten eragina ere; hartara, aukerarik egokiena hautatzeko moduan izango gara, eta antolamendu-helburuen arabera emaitzarik onena lortzeko. Horrek esan nahi du, erabakiak ondo hartzekotan, gaitasuna eduki behar dela egitekoak itxura onez eta fin egiteko, eta hartutako erabakiek ekar ditzaketen ondorioen jakitun izan.
• Komunikatzea: Besteari entzuteko eta ulertzeko gaitasuna da, eta eskatutako informazioa argi eta egoki emateko gaitasuna, zertarako eta, batetik, erakundearen helburuak lortzeko eta, bestetik, erakundearen maila guztiak barne hartzen dituzten komunikazio-kanal irekiak eta harreman-sare formalak eta informalak mantentzeko. Ezinbestean informazioa zorrotz eta eraginkor kudeatu behar da horrela jardutekotan, feedback-ari eta komunikazio-fluxuari erreparatuz.
• Ekimena izatea: Gaitasuna izatea proaktiboki jarduteko eta erronka berrietarako konponbideak asmatu eta aplikatzeko, kemenez eta nork bere iritziaren arabera, kanpotik inork horretara behartu gabe. Egoera berririk sortuz gero, azkar, eraginkortasunez eta fin erantzuteko gaitasuna izatea. Jakin-mina eta irrika izatea, eta aukera edo arazoetarako konponbide berriak bilatzea.
Azken aldaketako data: